A noiesa Eli Dosil parteu rumbo a Venezuela para participar durante os vindeiros quince días nunha misión humanitaria destinada a recuperar servizos básicos no estado de La Guaira, afectado recentemente por un devastador terremoto. A intervención arrancará coa instalación de lavanderías comunitarias, un primeiro paso para mellorar as condicións de vida das persoas damnificadas.
Esta expedición supón un fito histórico ao ser a primeira intervención internacional da Asociación de Voluntariado Local de Noia, entidade creada para impulsar a solidariedade tanto no ámbito municipal como no exterior. Para facelo posible, a asociación noiesa asinou un convenio coa organización vasca GBGE, especialista en emerxencias e cooperación internacional.
Unha viaxe con fondos persoais e experiencia previa
Para Dosil, a viaxe ten un profundo compoñente emocional. Aínda que vive en Noia desde que era un bebé, naceu en Caracas, onde a súa familia emigrou no seu día como tantos outros galegos:
«Igual que un día houbo familias galegas que atoparon en Venezuela unha oportunidade para construír unha vida, hoxe queremos devolver, con humildade, unha pequena parte de toda esa solidariedade», sinala a voluntaria.
Non é a súa primeira experiencia en catástrofes. Tras o paso da DANA por Valencia, Dosil xa traballou durante máis de un mes como voluntaria en Paiporta xestionando a recepción e distribución de axuda humanitaria.
Cooperación «de local a local»
Baixo o lema de fuxir de grandes discursos e centrarsa nas accións útiles, a voluntaria defende a forza da solidariedade veciñal:
«A cooperación non consiste en chegar para salvalo todo. Consiste en estar onde podes ser útil e facer ben a parte que che toca. O que intentamos facer é tender unha man e facer un pouco máis fácil o día a día das persoas afectadas».
Con este desprazamento arranca tamén a iniciativa “Noia con Venezuela”, mediante a cal a asociación informará á veciñanza do municipio sobre o desenvolvemento dos traballos no terreo.
