O Consello da Xunta desatasca un investimento de 8,5 millóns para o novo sistema IANUS5 e dá luz verde a axudas clave para a ELA, a violencia sexual e o reforzo de persoal en Ourense.
A xuntanza semanal do Executivo galego serviu para poñer cifras e tecnoloxía ao servizo dos enfermos: os pacientes do Sergas poderán, en breve, comunicarse directamente vía chat cos seus médicos de Atención Primaria.
A medida forma parte dun paquete de 8,5 millóns de euros destinados a renovar as entrañas do sistema sanitario coa plataforma IANUS5. Un salto dixital que incorporará intelixencia artificial e axilizará as interconsultas entre especialistas, aínda que coa caricia máis cercana do chat directo co profesional de referencia, unha opción que quedará a criterio de activación de cada médico.
Non foi a única decisión de impacto humano que saíu da mesa do Consello. Nunha xornada marcada polos servizos públicos, o presidente da Xunta, Alfonso Rueda, volveu colocar a Galicia na vangarda do apoio á enfermidade da ELA. Coa aprobación duns novos 2,1 millóns de euros, estimase que uns 200 doentes reciban unha achega directa de 12.000 euros anuais para paliar os devastadores custos da padecemento. Un fito no que Rueda non deixou pasar a oportunidade de enviar unha mensaxe a Madrid, reclamando que o Executivo central “rectifique e modifique os criterios da Lei ELA” para ampliar o abano dos supostos subvencionables máis aló dos puros coidados.
A urxencia sanitaria tamén tivo un nome propio no mapa autonómico: Ourense. A Xunta deu o visto e prace ao decreto que permitirá cubrir por concurso de méritos 25 prazas de médicos de Urxencias no hospital ourensán, co obxectivo de ter o cadro de persoal totalmente asentado no primeiro semestre de 2027.
Máis proteción social, actualización universitaria e impulso ao mar e campo
A mañá aínda deu para máis no eido da protección social. Galicia converteuse na terceira comunidade autónoma —tras o País Vasco e Asturias— en activar axudas específicas para vítimas de violencia sexual, reserva dous millóns de euros que serán compatibles con calquera outra prestación.
Coa mirada posta no futuro e na economía real, o Consello activou dous proxectos de calado:
- Educación Superior: Tras pechar o curso 2025-2026 con 141 graos e 218 másteres no sistema universitario público, inícianse os trámites para un novo decreto que redefinirá a oferta formativa. Flexibilizarase o número mínimo de alumnos para manter titulacións e buscaranse perfís máis adaptados ao mercado actual.
- Sector Alimentario: Aprobouse o Plan Director da Alimentación, dotado con 216 millóns de euros a tres anos. Unha inxección financeira destinada a protexer e modernizar un músculo económico do que dependen 2.100 empresas e máis de 35.000 traballadores do mar e do campo galego.
