As festas de Boiro comezan este venres 3 de xullo e os preparativos foron de todo menos tranquilos. Segundo denunciaron (e rexistraron) os veciños, esta semana de preparativos produciuse un importante altercado entre os feirantes que arranxaban os últimos detalles das súas atraccións, altercado que derivou nun intento de linchamento que xa está ser investigado pola Garda Civil, segundo reflectiu este venres a TVG, que relata que as persoas implicadas puideron enfrontarse tras un desacordo motivado polo espazo que debían ocupar.
Polo que transcendeu, a pelexa foi ben desigual e incluíu o uso barras de ferro por parte dun dos grupos que perseguiron a un dos seus contrincantes entre as atraccións xa instaladas. As testemuñas aseguran que o home que estaba só puido ser atacado ata por unha vintena de feirantes e en repetidas ocasións. No Hospital do Barbanza foron ingresados dous varóns, un de 20 anos e outro de 46, e unha terceira persoa.
A Garda Civil abriu unha investigación, a pesar de que non consta que haxa denuncias de ningunha das partes. Nun dos vídeos achegados pola TVG apréciase como unha veciña de Boiro tentou en todo o intre defender á persoa agredida dos e das feirantes que o perseguían, mesmo chegou a botarse enriba del para defendelo.
