Un home tivo que ser atendido por efectivos sanitarios na tarde deste xoves tras experimentar dificultades para saír do mar na praia do Dique, en Baroña, no concello de Porto do Son.
Segundo informou o 112 Galicia, o aviso produciuse arredor das 18.00 horas, cando un particular alertou de que un home estaba a ser arrastrado pola corrente e non conseguía regresar á beira. De inmediato, o Centro Integrado de Atención ás Emerxencias mobilizou a Urxencias Sanitarias de Galicia-061, así como a Salvamento Marítimo e ao Servizo de Gardacostas de Galicia.
Minutos despois, unha segunda chamada confirmou que o afectado lograra saír da auga impulsado por un golpe de mar e que xa estaba a ser auxiliado por persoas que se atopaban na zona. Os alertadores indicaron que o home precisaba asistencia sanitaria, polo que finalmente foi evacuado ao Hospital do Barbanza.
