A Catedral de Santiago acolleu este domingo a toma de posesión de tres novos cóengos do Cabido Metropolitano durante a celebración das primeiras vésperas da solemnidade dos Santos Pedro e Paulo, presidida polo arcebispo de Santiago, monseñor Francisco Prieto.
Os novos capitulares son Alfonso Novo Cid-Fuentes, director do Instituto Teolóxico Compostelán; Roberto Martínez Díaz, párroco moderador da Unidade Pastoral de Padrón; e José Sánchez Piso, administrador parroquial de Lestedo, Sales, Vedra, Trobe e Illobre. Os tres foran nomeados o pasado 1 de xuño.
A cerimonia reuniu aos membros do Cabido Catedralicio, sacerdotes da arquidiocese, familiares dos novos cóengos, representantes da vida diocesana e numerosos fieis.
A incorporación ao Cabido desenvolveuse segundo o rito tradicional. Tras a lectura do decreto de nomeamento, cada un dos novos cóengos realizou a profesión de fe e prestou xuramento ante o Evanxeo, antes de ocupar o seu sitial no coro da Catedral, un xesto que simboliza oficialmente a súa integración nesta institución.
Un chamamento ao servizo da Igrexa
Na súa homilía, o arcebispo Francisco Prieto lembrou que o nomeamento como cóengo non constitúe un recoñecemento honorífico, senón unha chamada ao servizo da Igrexa. Inspirándose na figura de san Paulo, convidou aos novos capitulares a exercer o seu ministerio desde a oración, a fraternidade e o anuncio do Evanxeo.
Prieto destacou tamén o papel da Catedral de Santiago como unha Igrexa viva que, ademais de custodiar a memoria do Apóstolo Santiago, debe continuar sendo un lugar de acollida para os fieis e os milleiros de peregrinos que chegan cada ano á cidade.
“A Igrexa é luz onde ilumina”
En representación dos tres novos cóengos, Alfonso Novo Cid-Fuentes agradeceu a confianza depositada neles e asegurou que a verdadeira grandeza da Igrexa non reside nos seus edificios nin nas súas cerimonias, senón na súa capacidade para acompañar ás persoas.
“A Igrexa é luz, non onde brilla, senón onde ilumina”, afirmou, reivindicando o labor que se desenvolve diariamente nas parroquias, mosteiros, na catequese, na atención aos enfermos e ás persoas máis vulnerables, así como o traballo de Cáritas e doutras entidades sociais.
Novo Cid-Fuentes subliñou que conservar a tradición apostólica significa transmitir vivo o Evanxeo ás novas xeracións e apostou por unha Igrexa aberta ao mundo, próxima ás persoas e capaz de saír ao encontro de quen busca esperanza.
O novo cóengo tamén destacou a responsabilidade da Catedral de Santiago como meta universal de peregrinación, sinalando que, ademais de acoller aos peregrinos, a comunidade cristiá está chamada a converterse ela mesma en “peregrina” cara ás persoas que máis necesitan acompañamento e consolo.
