O Concello de Noia fixo balance da actividade xerada polo Museo do Mar Carmen Barcia durante o mes de maio. Segundo fixo saber a Administración local, máis de 1.000 visitantes descubriron durante o último mes a riqueza da nosa cultura mariñeira. Esta importante afluencia de público “consolidou o Museo do Mar como un dos grandes referentes culturais da vila”, informou o Concello, que xestiona o dito espazo xunto coa Asociación Mar de Noia, entidade que achegou fondos históricos e traballou arreo na defensa do patrimonio mariñeiro local.
Tras apenas cinco meses de funcionamento, o museo xa traballa a pleno rendemento, achegando a veciños e visitantes a historia, as tradicións e o patrimonio vinculado ao mar que forman parte da nosa identidade.
Dende o Goberno Municipal anunciaron tamén que nos vindeiros meses serán acometidas actuacións para reparar e mellorar todo o contido tecnolóxico do museo e co obxectivo de “seguir ofrecendo unha experiencia de calidade a todas as persoas que nos visitan”.
O Concello agradeceu a importante e imprescindíbel implicación do Asociación Mar de Noia polo “seu compromiso e polo magnífico traballo realizado”, así como á Oficina de Turismo de Noia, que dende o mes de xaneiro impulsa os programas Visita Noia dirixidos a colexios, asociacións e colectivos, “contribuíndo a divulgar o noso patrimonio entre públicos de todas as idades”.
