O Concello de Outes acolleu onte a xornada de clausura do Concurso de Relatos do “Castelo de Outes”, unha iniciativa que combinou literatura, historia e patrimonio nun escenario de gran valor simbólico. A actividade desenvolveuse no entorno desta antiga fortaleza, derrubada polos irmandiños no século XV e da que hoxe se conservan apenas restos da que fora a praza forte da familia Mariño de Lobeira.
O certame naceu co obxectivo de dar a coñecer e divulgar a importancia histórica do castelo, convidando á cidadanía a establecer unha relación persoal co lugar a través da creación literaria. Nesta edición presentáronse arredor de vinte relatos repartidos en distintas categorías.
A organización correu a cargo de ULA – Librería Social, un espazo que se está a consolidar como referente comarcal na dinamización sociocultural e artística. A iniciativa contou coa colaboración de Elixio Vieites Castro, vinculado a proxectos como patrimoniogalego.net e historiadegalicia.gal; Andrés Rodríguez Sobrino, arqueólogo implicado na recuperación da memoria rural; e Antonio Rodríguez García, divulgador patrimonial e creador de Tremuzo, Historia e Patrimonio.
A xornada comezou na praza central da aldea de Outes, desde onde os participantes iniciaron un roteiro ata as ruínas do castelo. Unha vez no lugar, os organizadores ofreceron unha contextualización histórica, salientando o papel clave da fortaleza na configuración do actual concello.
Posteriormente tivo lugar a entrega de premios. Na categoría infantil (6 a 12 anos), a gañadora foi Claudia Mouriño Romarís co relato O Misterio do Castelo, recoñecido cun vale de 25 euros para gastar en ULA – Librería Social. Na categoría de adultos (maiores de 18 anos), o premio recaeu en María Arcos Cebreiro por Lume arcaico no verde das rochas, dotado cun vale de 50 euros.
A xornada destacou polo bo ambiente e polo interese amosado polos asistentes, confirmando o crecente compromiso da comunidade coa posta en valor do patrimonio histórico do Castelo de Outes.
