O Concello de Boiro colabora un ano máis coa organización do IV Torneo Solidario Interparroquial en beneficio de ASANOG, a Asociación de Cáncer Infantil e Xuvenil de Galicia. Será o vindeiro sábado 27 de xuño a partir das 17.00 horas en Vista Alegre. O concelleiro de deportes, Marcos Fajardo, participou este mércores 17 de xuño na presentación xunto con Lara Buig e Margarita Hermo, membros da organización, e Aldara Palmeiro, responsable de comunicación de ASANOG. O torneo contará con fase de grupos, final e semifinal. Este ano inclúese unha novidade pois, ademais dos oito equipos que representan a cada parroquia haberá dous equipos ASANOG formados por persoas relacionadas coa entidade. “Con esta iniciativa poñemos en valor a gran solidariedade que hai en Boiro e recadamos recursos para unha asociación que fai un gran traballo cos nenos oncolóxicos”, recoñeceron dende a organización.
Os partidos serán de 18 minutos agás a final, que será de dúas partes de 12 minutos. Outra das novidades deste ano é que participará no torneo a xogadora de As Celtas, María Nogueira. Ademais da parte deportiva haberá sorteos de produtos doados polo comercio local e animación musical.
“ASANOG leva dende o ano 2012 acompañando á infancia e adolescencia con cancro e todos os recursos son necesarios para contar cun equipo especializado de apoio nese proceso”, afirmaron dende a asociación. Pola súa banda, oconcelleiro de Deportes, Marcos Fajardo, agradeceu a implicación da organización, das entidades colaboradoras e da veciñanza de Boiro “por contribuír e implicarse sempre en iniciativas como esta que vai moito mais alá do eido deportivo e que supoñen moito para unha entidade como é ASANOG”.
