O Bloque Nacionalista Galego (BNG) de Outes presentou no último pleno municipal unha moción para impulsar a creación dun ciclo de Formación Profesional de Atención Sociosanitaria a Persoas Dependentes no instituto do concello. A iniciativa pretende ampliar a oferta educativa e dar resposta ás necesidades dunha poboación cada vez máis envellecida.
A través desta proposta, a formación nacionalista busca instar á Consellería de Educación a estudar a implantación destes estudos en Outes, co obxectivo de xerar novas oportunidades académicas e laborais, especialmente para a mocidade.
O voceiro do BNG local, Anxo Núñez, subliñou que esta formación representa “unha aposta de futuro”, tanto pola crecente demanda de profesionais no ámbito sociosanitario como polas posibilidades de inserción laboral que ofrece. Ademais, destacou a importancia de facilitar que a mocidade poida formarse sen ter que desprazarse a outros municipios.
Desde o BNG sinalan que a realidade demográfica de Outes fai necesario anticiparse ás necesidades de coidado das persoas maiores e dependentes. Neste sentido, Núñez puxo en valor a futura residencia impulsada pola asociación Adibismur como unha oportunidade laboral relevante para o alumnado que curse esta formación.
A formación nacionalista lembrou tamén que esta proposta se enmarca nunha liña de traballo continuada para ampliar a oferta formativa no municipio, na que xa defenderon anteriormente a incorporación doutros ciclos de FP vinculados á carpintería da madeira e á carpintería metálica.
Porén, a moción non contou co apoio do goberno municipal encabezado por Fran Calo nin do concelleiro tránsfuga, que votaron en contra durante o pleno. Desde o BNG lamentaron esta decisión e aseguraron que continuarán traballando para sacar adiante a iniciativa.
Finalmente, o grupo nacionalista anunciou que levará esta proposta ao Parlamento de Galicia para reclamar á Xunta a posta en marcha do ciclo formativo. “Outes non pode quedar atrás na planificación da oferta educativa que precisa a nosa comarca”, concluíu Anxo Núñez.
