O Concello de Noia iniciou esta semana as obras de mellora da contorna da Igrexa do Obre, cun investimento de 38.000 euros financiado integramente con fondos europeos do Plan de Sostibilidade Turística no Destino (PSTD).
A actuación permitirá completar a primeira fase das sendas peonís da zona e inclúe a execución de novos itinerarios en adoquín, así como a conexión ás redes de saneamento e a mellora do abastecemento de auga.
O alcalde, Fran Pérez, destacou que estes traballos contribúen á recuperación e posta en valor dun enclave de gran relevancia histórica e cultural para o municipio. Pola súa banda, o tenente de alcalde, Manolo Seijas, sinalou que a intervención permitirá mellorar especialmente o lugar do Sinó e os arredores da igrexa, incrementando a accesibilidade e a calidade do espazo.
A obra foi adxudicada á empresa local Tono Floro e enmárcase na estratexia municipal de conservación do patrimonio e modernización das infraestruturas, co obxectivo de crear espazos máis accesibles e atractivos tanto para a veciñanza como para as persoas visitantes.
