O Concello de Muros, a través da Concellería de Muller e Igualdade, organiza dúas actividades abertas á veciñanza co gallo da celebración do Día Internacional do Orgullo LGBT, unha data para reivindicar os dereitos, a liberdade e a dignidade de todas as persoas, independentemente da súa orientación sexual ou identidade de xénero.
O domingo 14 de xuño, ás 11:30 horas, no Artón (Esteiro), celebrarase o obradoiro As nosas bandeiras, no que as persoas participantes poderán elaborar colgantes pintados a man inspirados nas diferentes bandeiras que representan a diversidade LGBT.
Polo que respecta ao venres 19 de xuño, ás 19:30 horas, na Antiga Fábrica de Sal, celebrarase o coloquio Historias trans no pasado da Galiza, impartido por Daniela Ferrández, investigadora e divulgadora cunha ampla traxectoria no estudo e recuperación destas realidades historicamente invisibilizadas.
A concelleira de Muller e Igualdade, Maruxa Martínez, destacou que “o Orgullo é moito máis ca unha celebración. É unha oportunidade para comprender porque existe esta data, para coñecer a historia das quen tiveron que loitar por dereitos que hoxe consideramos básicos e para reflexionar sobre os desafíos que aínda persisten. Coñecer estas realidades axúdanos a construír unha sociedade máis respectuosa, diversa e inclusiva. Tomar conciencia do mundo no que vivimos é fundamental para seguir avanzando en igualdade e para que ningunha persoa teña que sufrir discriminación por ser quen é”.
Desde o Concello de Muros animan “a toda a veciñanza a participar nestas actividades, que combinan creación, coñecemento e reflexión, e que servirán para seguir preparando unha celebración do Orgullo baseada no respecto, na diversidade e nos dereitos humanos”.
