A conselleira de Medio Ambiente e Cambio Climático, Ángeles Vázquez, asinou este mércores 17 de xuño cadanseu convenio de colaboración cos alcaldes de Baiona, Jesús Vázquez Almuíña; O Porto do Son, José Luis Oujo, e Viveiro, María Carmen Gueimunde, para a posta en marcha do proxecto piloto de praias inclusivas promovido pola Xunta.
Segundo explicou Ángeles Vázquez, esta iniciativa consiste “na instalación de acubillos climáticos sostibles en praias propostas polos concellos -a da Ladeira, en Baiona; a do Cruceiro, no Porto do Son; e a da Area, en Viveiro- co obxectivo de que sirvan de refuxio ás persoas con problemas de mobilidade en caso de condicións meteorolóxicas adversas, como poden ser vagas de altas temperaturas”.
En concreto, estas estruturas, que estarán instaladas xa o vindeiro mes de xullo, contarán con accesos sen barreiras arquitectónicas, espazos amplos que permiten a mobilidade de persoas usuarias de cadeas de rodas, sinalización táctil e visual adaptada, zonas de descanso sen barreiras e elementos que favorecen a orientación e seguridade.
De feito, a conselleira incidiu en que estes elementos urbanos serán accesíbeis e de doada comprensión e contribuirán ao cumprimento dos requisitos asociados a distintivos de calidade ambiental e de servizos como a Bandeira Azul e a Bandeira Verde, xa que “melloran das condicións de accesibilidade, sostibilidade e confort dos espazos públicos”.
Con esta actuación, que conta cun orzamento de 85.000 euros da Consellería de Medio Ambiente e Cambio Climático, “avánzase na creación de contornas máis inclusivas e adaptadas ás necesidades da cidadanía, promovendo a igualdade de oportunidades no uso do espazo público”, engadiu Ángeles Vázquez.
