O incendio forestal declarado o pasado 12 de xuño na parroquia de Herbón, no concello coruñés de Padrón, quedou definitivamente extinguido nove días despois, tras ser dado por controlado polos servizos de emerxencia pasadas as 20.00 horas deste domingo.
O lume afectou a un total de 373,21 hectáreas de superficie, das que 298,57 correspondían a monte arborado e as 74,64 restantes a monte raso, segundo o balance definitivo facilitado pola Consellería do Medio Rural.
O incendio obrigou a activar de maneira preventiva a situación 2 de alerta pola súa proximidade a núcleos de poboación. Para os labores de extinción mobilizáronse de forma acumulada sete técnicos, 132 axentes, 166 brigadas, 122 motobombas, cinco pas, nove unidades técnicas de apoio, oito helicópteros e sete avións.
