A Asociación Pon un Sancosmeiro vai organizar en Noia, este sábado 27 de xuño e en estreita colaboración co Concello, a Festa do Sancosmeiro. Para poñer en situación a veciños e visitantes, a entidade e máis o Concello compartiron nas redes sociais o programa da xornada, unha máis que completa axenda que inclúe actividades musicais (ruadas, concertos, concertiños) para nenos e maiores, amais dunha Feira Galega de Artesáns que poderemos visitar durante todo o día nos Xardíns Felipe de Castro e que estará integrada por uns 15 postos de artesanía. Tamén haberá mostras e obradoiros, degustacións e exaltacións gastronómicas, un xantar popular postos de venda e actividades vespertinas para a rapazada (foliada libre, xogos sancosmeiros, obradoiros e unha actuación de Cé Orquestra Pantasma). Pola noite, Canto Sancosmeiro, sorteos e un concerto a cargo de Os Tres Pesos (a partir das 22h).
