Este domingo 21 de xuño toca poñerse as botas de camiñar para participar na Andaina Solidaria Boiro en marcha contra o cancro. A saída será ás 11.00 horas dende a praza de Galicia (fronte ao Concello) e o prezo de 8 euros para adultos e de 5 para nenas e nenos ata 12 anos. As inscricións están abertas a través da web Rochthesport.com ou presencialmente (consultar o cartel). Ademais, quen non poida asistir pode colaborar co dorsal solidario dispoñíbel en liña.
O Concello de Boiro colabora cunha nova edición da Andaina Solidaria Boiro, en marcha contra o cancro que organiza a Asociación Española contra o Cancro (AECC) de Boiro.
A andaina terá un percorrido circular de 5 quilómetros nos que se percorrerá o paseo do río Breiro, o paseo marítimo de Barraña, o esteiro do río Coroño e regreso á praza de Galicia.
As inscricións tamén poden facerse na farmacia ortopedia Ana Torrente, na galería Sargadelos, en Modas Naty ou na mesa que a Asociación ten na rúa peonil os sábados.
O alcalde de Boiro, José Ramón Romero, agradeceu o traballo “tan importante que realizar a Asociación Española contra o Cancro en Boiro” e convidou á veciñanza “a participar nesta cita solidaria”.
