A XI Travesía O Camiño a Vela viviu este mércores 24 de xuño unha xornada de descanso en Muros antes de renovar este xoves 25 a súa navegación cara a Barbanza, con escala na Pobra do Caramiñal.
Tras percorrer a Costa da Morte, con escalas como Muxía e Muros, os peregrinos do mar afrontan a partir deste xoves o treito final de navegación por mar da Travesía, que os levará desde Barbanza ata Vilagarcía de Arousa.
A chegada da flotilla á Pobra do Caramiñal reflicte o que Barbanza representa como territorio estreitamente vinculado ao mar, á cultura portuaria e ao Camiño de Santiago. Segundo informan dende a organización desta experiencia xacobea e marítima, “a situación do Barbanza na ría de Arousa converte esta escala nun punto especialmente significativo dentro do Camiño a Vela, ao aproximar aos peregrinos ao itinerario marítimo-fluvial que evoca a chegada do corpo do Apóstolo a Galicia”.
Na Pobra, os participantes gozarán dunha actividade mariñeira pensada para achegarlles á identidade local e ao vínculo da comarca co mar. A continuación, terá lugar unha recepción e a selaxe de credenciais.
A escala na nosa comarca será, ademais, a antesala da última etapa de navegación por mar desta XI Travesía, que o venres poñerá rumbo a Vilagarcía de Arousa.
O venres 26 de xuño, O Camiño a Vela afrontará a súa última etapa de navegación por mar con rumbo a Vilagarcía de Arousa. Ás 13.00 horas, está previsto un encontro con medios de comunicación nas escaleiras do porto deportivo, coa presenza de responsables a Mancomunidade do Salnés e o Concello de Vilagarcía de Arousa. Pola tarde, ao redor das 15.30 horas, os peregrinos participarán na Traslatio en catamarán, remontando o río Ulla. A continuación, realizarán a camiñada desde Pontecesures ata Padrón, onde está previsto a selaxe de credenciais na igrexa de Padrón. De regreso a Vilagarcía, celebrarán a cea e festa de peche da Travesía.
Último tramo a pé ata Santiago
O percorrido culminará o sábado 27 de xuño coa camiñada Padrón–Santiago, último tramo a pé desta peregrinación marítima. Os peregrinos do mar chegarán á praza do Obradoiro, onde finalizará esta XI Travesía e renderán culto ao Apóstolo.
Profesións Azuis: o mar como camiño de futuro
Nesta edición, O Camiño a Vela navega co lema das Profesións Azuis, unha mensaxe que cobra especial sentido en Galicia e, de forma moi especial, en territorios como Barbanza e O Salnés, onde o mar forma parte da vida económica, social e cultural.
Coa aplicación BluePath a bordo, a Travesía achega a mocidade, familias e comunidades locais as oportunidades de formación e emprego vinculadas á Economía Azul: navegación, pesca, actividade portuaria, turismo azul, ciencia mariña, tecnoloxía, sustentabilidade e innovación.
O Camiño a Vela conta, entre outros, co apoio da Axencia Turismo de Galicia e a colaboración de entidades comprometidas co desenvolvemento sostible da Economía Azul. Repsol participa como patrocinador principal da edición 2026, xunto con Touron/Mercury, B&G, Aqualia e o IME como patrocinadores.
