Aguiño foi o lugar escollido para acoller este xoves 18 de xuño unha nova reunión do Comité Social da rexión asociada Arousa-Lab, unha iniciativa nacida no marco do proxecto europeo Atlantic-Arctic Agora (A-AAGORA) para promover a colaboración entre os distintos actores vinculados ao mar e ao territorio. Na xuntanza participaron a directora xeral de Desenvolvemento Pesqueiro, Ma Ángeles Vázquez, os patróns maiores das confrarías de Carreira-Aguiño, Ribeira e A Illa de Arousa, así como representantes de OPMEGA e entidades vinculadas ao sector marítimo-pesqueiro e á conservación ambiental. Tamén asistiu o director xeral da asociación inclusiva da nosa comarca Amicos, Xoán España.
Durante a reunión realizouse un balance das accións desenvolvidas nos últimos meses e presentouse un novo caderniño de actividades dirixido á comunidade escolar. Un material didáctico que busca achegar aos máis novos á biodiversidade da ría, ás artes de pesca tradicionais e ao importante papel que desempeña a xente do mar na conservación e aproveitamento sostíbel dos recursos mariños.
Na xornada tamén participaron o director de Sostibilidade de Profand, Antonio Álvarez; o seu director de RR.HH, Alexandre Pérez; o director térnico de Octolarvae, Álvaro Roura, e o técnico David Costas. Eles encargáronse de explicar a labor que se está a desenvolver por parte de Octolarvae en materia de estudo e restauración de especies mariñas como o chopo ou o polbo. A continuación, os asistentes participaron nunha visita ás accións de restauración de fondos mariños que se están desenvolvendo nas augas do Parque Nacional Marítimo-Terrestre das Illas Atlánticas. Durante a actividade puideron coñecer de preto o traballo de recuperación de especies como as gorgonias, as algas laminarias (carrumeiras) ou a zostera, así como a súa importancia para a biodiversidade mariña e para a actividade pesqueira e marisqueira da ría.
Durante a mañá, o director xeral de Amicos destacou que “o máis importante de Arousa-Lab é o compromiso que continúan demostrando todas as entidades participantes. Administracións, confrarías, centros de investigación, organizacións do sector e entidades sociais estamos a traballar xuntos co obxectivo de poñer en valor a cultura mariñeira, apoiar á xente do mar e contribuír ao coidado do noso patrimonio natural”.
España engadiu que “a colaboración entre actores tan diversos é o que permite que xurdan iniciativas con impacto real no territorio. Arousa-Lab é un exemplo de como o diálogo, a cooperación e a implicación colectiva poden converterse nun motor para afrontar os retos ambientais e sociais da ría e construír oportunidades para o futuro”.
Pola súa banda, a directora xeral de Desenvolvemento Pesqueiro destacou o labor de iniciativas como Arousa-Lab: “Coidar do noso mar é garantir o futuro do noso sector marítimo pesqueiro. Non habería futuro sen non coidamos eses fondos, se non coidamos esa biodiversidade con accións como a que vamos realizar hoxe coa solta de laminarias, que son fundamentais para coidar os nosos fondos ao ser o berce de moitas das nosas especies. Quero agradecer a oportunidade de participar xunto ao noso sector”. Unhas palabras coas que coincidiu José Antonio Santamaría, patrón maior da Confraría de Carreira-Aguiño.
Unha iniciativa vinculada ao territorio e á súa xente
Arousa-lab, busca poñer en valor o traballo e a cultura mariñeira da zona, e afondar na labor que desenvolven os distintos actores da rexión mediante o reforzo positivo das súas boas prácticas. Tamén se contemplan distintas accións de restauración do fondo mariño, así como o estudo das solucións baseadas na natureza que poden aplicarse para adaptarse ao cambio climático. Naceu como rexión asociada do proxecto europeo A-AAGORA, financiado por Horizonte Europa, e impulsada pola Dirección Xeral de Desenvolvemento Pesqueiro e a asociación Amicos. Tralo que continúa coa participación das entidades que comezaron a aventura para seguir fomentando a sensibilización, o coñecemento e a posta en marcha de iniciativas que poñan en valor o traballo que se realiza por parte da xente do mar.
