A asociación ecoloxista ADEGA emitiu un comunicado crítico co Goberno galego polo “baixo nivel dos traballos de rexeneración practicados no terreo logo dos devastadores incendios do ano pasado”, que afectaron principalmente á provincia de Ourense, aínda que tamén a zonas da comarca do Barbanza e doutras zonas lindeiras.
No informe dise que “menos de 200 das 118.966 hectáreas queimadas en 2025 (o 0,16%) foron obxecto de medidas de restauración efectivas por parte da Xunta”. A asociación tamén di que “unicamente o voluntariado de ADEGA interveu en máis de 120 entre outubro de 2025 e abril de 2026”.
Engaden que “as recentes enxurradas acontecidas na comarca Valdeorras, que mobilizaron auga e sedimentos dende os montes queimados o pasado verán, amosan as consecuencias do desleixo por recuperar a funcionalidade ecolóxica dos territorios afectados polo lume”.
Tamén critican á Administración autonómica por seguir centralizando o traballo na extinción, “que abrangue”, din, “o 75% (159 millóns de €) dos 213 millóns do PLADIGA 2026, relegando a prevención (53 M€) e a formación (0,9 M€) e esquecendo por completo a restauración (0 €), fai que as consecuencias dos lumes atinxan máis aló do período de alto risco, o que maximiza os impactos negativos e pon en perigo vidas e facendas”.
E engaden: “Desde ADEGA e a comunidade científica temos advertido en numerosas ocasións da necesidade de intervir de urxencia nos territorios afectados polo lume para evitar as perdas de solo polos arrastres das avenidas e recuperar canto antes a funcionalidade ecolóxica deses espazos”.
