O Arquivo-Biblioteca da Catedral de Santiago presentou este xoves unha nova edición facsímil do Códice Calixtino cuxo primeiro exemplar será entregado ao papa León XIV.
O anuncio foi realizado polo arcebispo de Santiago de Compostela, Francisco Prieto, durante un acto no que estivo acompañado polo cóengo arquiveiro, Francisco Buide e o editor da obra Joaquín González Villamor. Prieto avanzou que a entrega ao Pontífice realizarase “no seu momento” e expresou a súa “esperanza fundada” de que o Papa visite a capital galega con motivo do próximo Ano Santo Xacobeo.
A edición, limitada a 500 exemplares certificados e numerados ante notario, reproduce fielmente o manuscrito orixinal mediante técnicas avanzadas de fotografía e impresión. Está elaborada en papel especial similar ao pergamiño, con distintas gramaxes, e incorpora pregues, texturas e detalles que replican o códice medieval.
O volume, dunhas 450 páxinas, inclúe miniaturas e capitulares a toda cor e presenta unha encadernación en pel estampada ao lume con motivos ornamentais. Acompáñase ademais dun estoxo de conservación e un libro de estudos complementario.
Durante a presentación, o arcebispo destacou o valor do Códice Calixtino como obra “clave” para comprender o Camiño de Santiago. Lembrou que o orixinal, concibido para a súa lectura e uso litúrxico, constitúe unha recompilación de textos que abordan rutas, cidades, santuarios, costumes e consellos prácticos para os peregrinos.
Prieto subliñou así mesmo que o códice “segue sendo un libro vivo” e definiuno como a “primeira gran síntese” da memoria xacobea e da peregrinación compostelá. Neste sentido, sinalou que pode considerarse un dos testemuños fundacionais da conciencia europea xurdida na Idade Media.
