O Campo da Feira de Noia converterase o vindeiro 13 de xuño nun espazo de encontro, música e convivencia coa celebración da primeira edición de A Berberechiña, a Festa da Diversidade, unha proposta que mestura gastronomía, actividades participativas e concertos gratuítos ao longo de toda a xornada.
O Concello de Noia presentou esta mañá a programación dun evento pensado para atraer á veciñanza durante todo o día. A concelleira de Cultura, Chelo Martínez, explicou que o obxectivo é ofrecer unha experiencia completa e accesible: “Queremos que a xente veña desfrutar da sesión vermú, do picnic, da Festa da Tortilla e de todas as propostas que temos preparadas antes de chegar aos concertos da noite”.
A xornada arrancará pola mañá coa lectura do manifesto e continuará coa sesión vermú. Ao mediodía, o público poderá participar no maripicnic e na Festa da Tortilla, que nesta primeira edición terá carácter solidario en beneficio de Cruz Vermella Noia.
Xa pola tarde, o programa inclúe actividades infantís, baile, unha foliada aberta e un Maribingo musical, antes de dar paso ao tramo final da celebración.
A partir das 20:00 horas, o escenario acollerá os concertos de Jerry Noia Jukebox, Montedapena e Hydn. A programación musical comezará coa actuación do noiés Jerry Noia, que ofrecerá un repertorio de versións, nunha noite que converterá o Campo da Feira nun espazo de concertos ao aire libre.
Pola súa banda, o tenente de alcalde, Manolo Seijas, destacou a colaboración entre entidades para facer posible esta primeira edición e agradeceu especialmente a implicación de Cruz Vermella Noia na organización da Festa da Tortilla solidaria. “É unha satisfacción poder contar coa súa cooperación nun evento que busca unir á xente arredor da música, da convivencia e da participación”, sinalou.
Desde o Concello animan á veciñanza a acudir con familia e amizades para desfrutar dunha xornada aberta e inclusiva na que todo o mundo é benvido.
