Unha nena de dous anos faleceu en Brión despois de permanecer varias horas no interior do vehículo do seu pai, que a esqueceu ao ir traballar sen deixala na gardería.
Os feitos ocorreron na estrada que une Bertamiráns con Noia, no lugar de Algueidón, na parroquia dos Ánxeles. Ata a zona desprazáronse axentes da Policía Xudicial da Garda Civil, que investigan o sucedido.
A cativa chegou ao Punto de Atención Continuada de Bertamiráns en parada cardiorrespiratoria.
Faltaban uns minutos para as cinco da tarde cando o 112 Galicia recolleu un aviso de Urxencias Sanitarias de Galicia-061 por unha menor en parada que finalmente resultou falecida.
Desde o Centro Integrado de Atención ás Emerxencias de Galicia solicitouse a intervención dos axentes da Garda Civil.
Tamén foron avisados os membros do Grupo de Intervención Psicolóxica en Catástrofes e Emerxencias (GIPCE) co fin de ofrecer á familia atención especializada.
