De cara a unha moción de censura que reclaman socialistas da talla de Felipe González e García-Page, Vox e unha parte do PP, a frase pronunciada por José María Aznar o 2 de novembro de 2023 (“O que poda facer, que faga”) recupera estes días un valor que a oposición a Pedro Sánchez (e por derivación a Rodriguez Zapatero) emprega para fustrigar ao expresidente Zapatero pola súa presunta participación no rescate económico (53 millóns de euros) da empresa aérea “Plus Ultra”, afectada -coma outras aeroliñas asimesmo rescatadas- pola pandemia de coronavirus que tantas mortes provocou en España e boa parte de Europa. Zapatero está investigado polo xuíz da Audiencia Nacional, José Luis Calama, pola súa presunta intervención nunha trama organizada de tráfico de influencias, cuxo sumario está composto por oito tomos de preto de 4.000 páxinas. O xuíz Calama aceptou este martes retrasar a declaración do expresidente aos días 17 e 18 de xuño, como o propio Zapatero solicitara co obxecto de estudar ben a causa que se sigue contra del.
Zapatero ten negado calquera irregularidade (está acusado de organización criminal, tráfico de influencias e falsidade documental) no marco desta causa que deriva na imputación do expresidente e que induce a investigar ás dúas fillas deste e ao empresario venezolano Danilo Diazgranados Mangalo e ao comisario Gómez Martín.
O Ministerio Público, a instancias dunha orde europea de investigación da Fiscalía de Delictos Financeiros de Francia e dunha Comisión Rogatoria da Fiscalía de Suíza, comunicaron que o rescate da compañía aérea “Plus Ultra” puido ser utilizado para lavar diñeiro de Venezuela.
Con esta información téntase investigar se o rescate de Plus Ultra puido ser utilizado para o devandito “branqueo”. As dilixencias de entrada e rexistro levadas a cabo a instancias da Fiscalía apuntan tamén á posibilidade de que altos executivos dunha petroleira española foran “influenciados” por Zapatero.
Esta formulación fai cavilar na presunta conexión de todas as actuacións -iniciadas xa vai un ano- co dito por Aznar en novembro de 2023 no senso de que “o que poda facer, que faga”, entendida a frase coma unha consigna para acadar a caída do Goberno presidido desde vai oito anos por Pedro Sánchez.
