O rexedor de Boiro, José Ramón Romero, xunto cos demais membros do Goberno local, estiveron este martes 26 de maio en Cures no marco dos encontros veciñais Un café co alcalde. Durante a xuntanza o alcalde e concelleiros deron conta das distintas accións realizadas, presentaron os proxectos que están pendentes de executar e atenderon as demandas trasladadas pola veciñanza.
En canto aos proxectos máis destacados o alcalde destacou as obras para a mellora da eficiencia enerxética do Centro Social de Cures que se atopa neste momento en fase de licitación. Un proxecto que ascende aos 155.795,08 euros mediante o que se vai cambiar a cuberta e impermeabilización da fachada para evitar as humidades, así como cambiar as carpintarías.
O alcalde presentou tamén o proxecto para dotar aos núcleos de Cures e Ameán de saneamento mediante un sistema de depuración propio, unha actuación presentada como adicional no Plan de Obras e Servizos (POS+ Concellos) da Deputación da Coruña; así como outras actuacións pendentes de execución como o pavimentado de Enseño a Pomar do Río ou a reforma do parque de Ameán.
Estes encontros teñen como finalidade “ter un contacto máis directo coa veciñanza” e “darlles a oportunidade de que trasladen as súas peticións e demandas sen necesidade de ter que desprazarse ao Concello, complementando así as xuntanzas particulares que se manteñen con todos aqueles veciños que así o solicitan”, informou o Goberno local.
O seguinte encontro será na parroquia do Castro, que se fará en dúas sesión. Unha delas na unitaria do Esteiro e a outra no Centro Social de O Cabo da Cruz.
