O Concello do Porto do Son vai celebrar con música o Día das Letras Galegas e o legado da escritora viguesa Begoña Caamaño (homenaxeada na edición deste ano). Así, o cuarteto Balteira visitará O Porto do Son o vindeiro 17 de maio para festexar a nosa cultura. A actuación terá lugar na praza de España (no caso de choiva será na Casa da Cultura de Porto do Son) e dará comezo ás 20:00 horas
Este grupo nace a finais do 2025 en Betanzos da man de Cris Sánchez e Noa Migal (voces e percusións), Álex Fente (acordeón) e Pablo Pacior (ventos). A súa proposta céntrase na recuperación do repertorio oral galego, incorporando arranxos contemporáneos pero respectando a estrutura e a emoción das pezas tradicionais.
Os cantares que sempre encheron de festa os torreiros e as melodías instrumentais para o baile, son o eixo sobre o que xiran os seus concertos, mantendo o espírito da foliada desde a calidade técnica e interpretativa destes catro grandes da nosa música tradicional.
Entre as gravacións xa editadas pola banda destacan o Maneo de Anxeriz, con arranxo de Pedro Lamas, e a Muiñeira de Bardaos, cun singular vídeo gravado no CIEC, espazo referente en Betanzos.
