O Museo do Gravado de Artes (MUGART) vai inaugurar este sábado 9 de maio a mostra Jules Verne, Viaxe ao centro da Terra. A cita será ás ás 12.30 h na sala 0 do museo ribeirán. O proxecto expositivo confórmase por 65 debuxos á augada orixinais do debuxante Ignacio Hernández Suñer, máis coñecido como Íñigo. Toda esta obra pertence aos fondos do MUGART. A exposición poderá contemplarse do 9 de maio ao 8 de agosto 2026.
A mostra rende homenaxe ao escritor francés Jules Verne (1828-1905) e máis concretamente ao universo creado arredor dun dos seus libros máis célebres: Viaxe ao centro da Terra.
O MUGART lembra que Verne é coñecido en todo o mundo, en moitas linguas, polas súas novelas que mesturan aventura xeográfica, afán didáctico e progreso científico.
En 1864 publicou Viaxe ao centro da terra, que segue a reeditarse nos nosos días. Foi a segunda novela da serie Viaxes extraordinarias que comezara en 1863 con Cinco semanas en globo. A serie é de gran optimismo, de fe no progreso, que logo virará ao pesimismo a partir de 1879 ata as novelas póstumas O eterno Adán e A estraña aventura da misión Bardac.
As súas novelas tiveron moitos e bos ilustradores e o MUGART conserva ilustracións orixinais de Íñigo para Viaxe ao centro da terra, 20.000 leguas de viaxe submarina, Don Quixote da Mancha e As mil e unha noites, que foron a base de albumes ilustrados, de cromos e de adaptacións de novelas clásicas para a editorial Archivo de Arte.
Íñigo foi un ilustrador da mítica editorial Bruguera, de verdadeiro nome Ignacio Hernández Suñer, nado en Granollers en 1924 e falecido en Barcelona en 2015. Debuxante de tiras cómicas, comezou a súa carreira de ilustrador na década de 1950, e Viaxe ao centro da terra ilustrouna a fins desa década. Colaborador de Pueblo e ABC, a súa serie máis coñecida foi Lola, editada a partir de 1975. Expresividade, seguridade no debuxo e dominio da cor, caracterizan as súas ilustracións.
A novela de Verne é considerada por algúns críticos a primeira historia de ciencia ficción. Relata o achado do profesor Otto Lidenbrock dun libro antigo no que atopa un papel con xeroglíficos, que descifra coa axuda do seu sobriño Axel. O papel contén as indicacións para unha viaxe ao centro da terra, que realizarán Otto, Axel e o guía Hans.
Jules Verne conxuga con maña, neste libro, os elementos fantásticos cos datos científicos e así realidade e ficción xa non son perceptíbeis como tales e intégranse nun todo, o texto da novela. “Poder desfrutar destes orixinais únicos de Íñigo é posíbel grazas aos fondos do MUGART que nesta ocasión expón por primeira vez todos os orixinais que conserva de Viaxe ao centro da terra”, confirmaron dende a dirección do museo de Artes (Ribeira).
