O Ateneo Valle-Inclán de Ribeira, con sede na praza de Compostela de Santa Uxía, compartiu con O Barbanza a súa carta-artigo de adhesión e apoio á iniciativa veciñal para recoñecer o importante legado do veciño de Pombal Francisco Domínguez Martínez, Quico, enxeñeiro industrial, articulista e militante galeguista, falecido en 2024.
O Ateneo Ribeira, a través do seu presidente Ciprián Rivas Fernández, acordou en reunión celebrada en data do 23 deste mes de abril, con único punto da orde do día, adherirse á iniciativa de que se nomee unha praza deste concello no barrio do Pombal como Francisco Domínguez Martínez, “Quico Domínguez”, ribeirense afincado en Vigo, enxeñeiro industrial, profesor da Universidade de Vigo e figura destacada do galeguismo cultural e político, entre outros méritos.
Foi presidente da editorial SEPT, impulsor da tradución da Biblia ao galego,membro directivo da Fundación Penzol e da Editorial Galaxia, e mantivo un compromiso constante co país e coa lingua galega ao longo de toda a súa vida.
A súa traxectoria, discreta e rigorosa, contribuíu de maneira decisiva á dignificación da nosa cultura e ao fortalecemento dun proxecto colectivo de país que merece recoñecemento público. O dedicar unha praza ao seu nome sería un acto de xusta homenaxe, e tamén unha maneira de transmitir ás xeracións vindeiras o valor do compromiso cívico, cultural e galeguista.
E por isto que desde o Ateneo Ribeira súmase a esta proposta para que sexa tida en conta como un xesto de gratitude institucional cara a quen, polos seus méritos, merece ser lembrado como un dos bos e xenerosos de Ribeira.
Asinado: Ciprián Rivas Fernández o 24 de abril de 2026.
