O alumnado do Programa Integrado de Emprego (PIE) do curso 2025/2026 que levan a cabo de forma conxunta os concellos de Boiro, Rianxo e A Pobra participou o pasado xoves 30 de abril nunha xornada orientada a mellorar a súa empregabilidade.
Nesta sesión as persoas participantes tiveron oportunidade de mellorar as súas competencias para afrontar e superar entrevistas de traballo dinámicas e grupais. Durante a xornada leváronse a cabo dinámicas de role playing recreando entrevistas e dinámicas grupais que permitiron ás persoas participantes ver como actuaban ante estas probas de selección.
A actividade estivo impartida por Nuria Figueira, responsábel de Talento Corporativo de JEALSA Foods SA, quen achegou a súa experiencia en selección e desenvolvemento de persoas, guiando, acompañando e aconsellando ás persoas asistentes ao longo da sesión.
O Programa Integrado de Emprego do Concello de Boiro 2025/2026 realízase en colaboración co Concello de Rianxo e de A Pobra, e está subvencionado pola Consellería de Emprego, Comercio e Emigración da Xunta de Galicia e o Servizo Público de Emprego Estatal.
