As alumnas e alumnos de 1º curso da ESO do IES Nº1 de Ribeira, xunto con Ramón Molina, educador social e responsábel do Programa de Convivencia Positiva e Prevención do Acoso Escolar organizado pola ANPA Caramecheiro (organizado coas axudas dirixidas ás asociacións de nais e pais do alumnado de centros educativos de Galicia coa finalidade de potenciar a promoción da igualdade e a prevención da violencia de xénero), presentaron a súa campaña de sensibilización contra o acoso escolar.
Dita campaña, foi elaborada polo propio alumnado durante varias semanas, e foi difundida non só dentro centro educativo senón tamén a través das redes sociais, grazas as creatividades animadas que estes prepararon e que foron proxectadas durante este acto.
Eles mesmos elixiron, entre os 28 lemas propostos polos seus compañeiros, aos 3 gañadores cos que crear as creatividades animadas. Un por cada categoría:
Mensaxe para potencial alumnado acosador: Bro, a violencia é cargosa.
Mensaxe para potencial alumnado observador: Non é un xogo… é acoso.
Mensaxe para promover o punto laranxa: O teu silencio é máis sufrimento.
Asemade, os seguintes 8 lemas máis votados formaron parte da celebración da efeméride do día 2 de maio, o Día Mundial Contra o Acoso Escolar. Así, elaboráronse carteis con eses lemas, que o propio alumnado dispuxo naqueles puntos do centro educativo que consideraba que viñan sendo os máis propicios para que as súas mensaxes cheguen a quen van dirixidas.
A creatividade xerada pola campaña pódese visualizar no Facebook da ANPA.
