A Feira do Libro de Noia pechou esta fin de semana cun balance moi positivo, consolidándose como unha das citas culturais de referencia na comarca tras reunir durante tres días a centos de persoas arredor da lectura e das actividades para todos os públicos.
O bo tempo acompañou ao longo de toda a fin de semana, con xornadas soleadas que favoreceron unha elevada asistencia e permitiron desfrutar plenamente da programación. A Alameda converteuse así no epicentro da actividade cultural, cun ambiente animado e continuo fluxo de visitantes.
Un dos aspectos máis destacados desta edición foi a gran acollida dos obradoiros e actividades infantís, que rexistraron unha alta participación e completaron aforos en numerosas sesións. As propostas dirixidas á cativada contribuíron a dinamizar o recinto e a reforzar o carácter familiar do evento.
A concelleira de Cultura, Chelo Martínez, subliñou “a gran afluencia de veciños e veciñas, así como de persoas visitantes”, que evidenciaron “o interese que existe en Noia pola cultura e pola lectura”. Así mesmo, agradeceu “o traballo de todas as persoas, asociacións, editoriais, autoras e autores que participaron na feira” e destacou a importancia de “achegar a lectura aos máis cativos”.
Desde o Concello valoran moi positivamente o desenvolvemento da feira, salientando tanto o ambiente cultural e familiar vivido durante as tres xornadas como a boa acollida das presentacións, actividades e postos participantes.
