A deputada de Cultura da Deputación da Coruña, Natividade González, visitou este martes 26 de maio a Casa RIA, sede en Santiago da fundación dese nome, impulsada polo arquitecto inglés David Chipperfield, afincando en Corrubedo. A entidade foi unha das 50 beneficiarias da liña de subvencións culturais FO2015, para as cales a Administración provincial destinou case 650 000 euros este ano. Alí puido coñecer de primeira man a exposición Deseño para vivir e o programa público vinculado a esta proposta cultural, impulsada ao abeiro destas axudas.
Durante a visita, González puxo en valor o traballo da Fundación RIA como espazo de reflexión, creación e divulgación arredor do deseño, a arquitectura e o territorio, así como a capacidade deste tipo de iniciativas para conectar cultura, pensamento contemporáneo e participación cidadá.
A responsábel de Cultura da Deputación tamén subliñou a importancia de apoios como o programa FO2015, cuxo obxectivo é “facilitar a programación de actividades culturais e fortalecer a rede de entidades que traballan pola promoción e difusión da cultura galega”, ao tempo que subliñou “o compromiso da institución provincial co apoio ao sector cultural”.
Deseño para vivir presenta unha selección de obxectos desenvolvidos polo estudio David Chipperfield Design nos últimos 35 anos e propón unha reflexión sobre o papel do deseño nun contexto de cambios sociais e crise ambiental.
A mostra pon o foco na relación entre deseño, territorio e vida cotiá, destacando a importancia dos materiais locais, das tradicións propias e dos modos de produción vinculados ao contexto galego.
A exposición esténdese polas dúas primeiras plantas da Casa RIA e inclúe obxectos, bosquexos, revistas, fotografías de proceso, materiais, maquetas e prototipos. Poderá visitarse até o 30 de xuño, de luns a sábado, en horario de 10 a 17 horas.
A Fundación RIA (Rede de Innovación Arousa) ten como obxectivo principal actuar como un think tank independente dedicado á investigación, análise e planificación territorial estratéxica de Galicia. A súa meta é preservar os valores naturais e culturais dos concellos do Barbanza (a ancestral relación dos seus habitantes co territorio e co mar, sustentábel e enriquecedora) de Galicia mentres se promove unha mellor calidade de vida.
