O Concello de Noia iniciará este luns 4 de maio as obras de saneamento e renovación do firme nas rúas Brasil e Lorenzo de Armada, en palabras do Executivo “unha actuación clave para mellorar as infraestruturas urbanas da zona”.
Dende o Concello explican que “aínda que xa se levaron a cabo traballos previos de preparación, será a partir deste luns cando comecen as actuacións de apertura, marcando o inicio efectivo dunha intervención moi demandada pola veciñanza”.
E engaden: “Este Goberno municipal aposta pola xestión directa das obras a través da Brigada Municipal, co obxectivo de optimizar os recursos públicos e garantir unha execución de calidade”. Esta nova actuación ponse en marcha tras a finalización dos traballos realizados pola brigada en Albariza e no Campo da Feira, reforzando así a continuidade da planificación municipal.
O proxecto permitirá implantar un sistema de saneamento separativo, co fin de evitar a sobrecarga dos bombeos, especialmente durante os episodios de choiva.
“Esta mellora contribuirá a un funcionamento máis eficiente da rede e a unha maior sustentabilidade do sistema”, informou o Concello, engadindo que “levarase a cabo unha renovación do firme, co fin de garantir maior seguridade viaria e comodidade tanto para peóns como para vehículos”.
As obras desenvolveranse por tramos, unha planificación que busca minimizar o impacto na actividade comercial e na vida diaria da zona.
