CONGALSA seguirá colaborando estreitamente co Club Baloncesto Rianxo, unha das entidades deportivas da comarca do Barbanza á que apoia baixo a fórmula de patrocinio. A directora de Relacións Externas da compañía de alimentación, Isabel Cañas, desprazouse na mañá deste 5 de maio ata as instalacións do club rianxeiro para manter unha reunión coa súa presidenta, Almudena Somoza, que lidera a entidade desde agosto do ano pasado. No encontro participaron tamén Natalia Blanco, tesoureira do club, e Arturo Calvo, anterior presidente.
Durante a visita, Isabel Cañas puido coñecer de primeira man a actividade do Club Baloncesto Rianxo, así como a súa estrutura, o número de equipos que o compoñen e a relevancia do baloncesto feminino dentro da entidade, entre outras cuestións. Ademais, mantivo un encontro con representantes de varios equipos das categorías premini, mini e infantil, tanto masculinas como femininas.
A directora de Relacións Externas de CONGALSA trasladou o apoio da compañía ao club no marco da súa política de responsabilidade social corporativa, na que o fomento do deporte de base ocupa un papel prioritario, xunto á promoción da cultura e o respaldo a entidades sociais da contorna.
Fortalecemento de vínculos
Isabel Cañas expresou a importancia de fortalecer os vínculos co tecido deportivo local. “Para CONGALSA é fundamental estar preto da contorna no que desenvolvemos a nosa actividade. O deporte de base é fundamental para crear hábitos de vida saudables desde a infancia e para transmitir valores que acompañan ás novas xeracións máis aló do ámbito deportivo, algo que o Club Baloncesto Rianxo reflicte á perfección coa súa actividade”, asegurou.
Pola súa banda, a presidenta do club agradeceu o apoio e a visita da directora de Relacións Externas da empresa da Pobra do Caramiñal, destacando a súa vontade de consolidar relacións estábeis co tecido empresarial local para seguir impulsando o crecemento do proxecto deportivo.
Ambas as partes coincidiron na importancia de continuar fortalecendo a relación entre empresa e deporte local, co obxectivo de xerar un impacto positivo na comunidade.
