Este sábado 30 de maio o Campo Municipal de Barraña vai acoller a partir das 11.30 horas o Trofeo Concello de Boiro: unha importante cita deportiva que mobiliza boa parte da comunidade deportiva do termo municipal, de feito participan todos os clubs con base no concello.
O trofeo celebrarase o vindeiro sábado 30 de maio nunha xornada única, pola mañá a eliminatoria previa a partir das 11.30 horas e, pola tarde, terán lugar as semifinais nas que xogarán o CD Boiro contra o mellor perdedor da eliminatoria e ás 18.00 horas os dous gañadores da eliminatoria. A final terá lugar ás 19.30 horas.
“Este trofeo está pensado como unha festa de todos os equipos de fútbol de Boiro para celebrar o fin da tempada”, afirmou a organización, engadindo que “constitúe a unión de todo o fútbol boirense, independentemente da categoría na que xogan”.
O prezo da entrada é de cinco euros e a recadación será doada a entidades sociais do municipio.
