O Colexio Sagrado Corazón de Xesús de Castiñeiras (Ribeira) celebrou en abril a nova edición (a novena xa) do Día dos Avós e as Avoas, unha xornada familiar de confraternidade dirixida non só a estreitar os vencellos entre as e os integrantes da comunidade escolar senón tamén a reivindicar o imprescindíbel papel que xogan as avoas e os avós na educación e nos coidados.
O acto foi venres, 24 de abril, ás 15.00 horas, nas instalación do propio centro educativo de Castiñeiras.
Asistiron alumnado, familias e profesorado; involucrando así á comunidade educativa do centro.
A festa estivo animada coa música tradicional. Así, houbo actuacións de pandeireteiras e bailes rexionais que fixeron que os máis maiores botasen a man ao pandeiro e os pequenos apreciasen a nosa cultura.
Para rematar, celebrouse unha degustación todo xestionado pola Asociación de Nais e Pais (ANPA) do centro, onde non faltaron as conversas, as risas e os abrazos. Á dita festa asistiron arredor de 300 persoas.
Foi, en palabras da dirección do centro e da ANPA do colexio, “unha tarde sinxela, pero chea de significado, na que se puxo en valor o papel fundamental dos avós: mestres de vida, contadores de historias e gardiáns das nosas raíces. Sen dúbida, unha celebración para lembrar e repetir”.
