A maxistrada Paz Filgueira Fernández protagonizará este venres en Ribeira un faladoiro centrado no papel da xustiza na loita contra a violencia de xénero.
O acto, organizado pola Coordinadora Local da Marcha Mundial das Mulleres da Barbanza, celebrarase ás 20.00 horas no Centro Cultural Lustres Rivas.
Durante a conferencia, a titular do xulgado de Instrución número 3 de Santiago de Compostela abordará a necesidade de seguir reivindicando os dereitos das mulleres en todos os ámbitos da sociedade, con especial atención ao sistema xudicial.
A maxistrada fará fincapé na situación das mulleres que denuncian aos seus agresores e nas dificultades legais ás que tamén se enfrontan os seus fillos e fillas ao longo dos procesos xudiciais.
O encontro desenvolverase en formato aberto, permitindo a participación do público asistente mediante preguntas e intervencións. Filgueira conta cunha ampla traxectoria tanto no ámbito xudicial como no movemento feminista, formando parte da Comisión de Violencia da Xuízas e Xuíces para a Democracia, dedicada á análise da violencia machista, a prostitución e a trata de persoas.
A iniciativa está impulsada polas entidades que integran a Marcha Mundial das Mulleres da Barbanza, entre elas Mulleres en Acción, Mulleres en Loita, As Malas Herbas, As Púrpuras, Galiza Nova Barbanza, a Asemblea Intercomarcal de Mulleres do BNG da Barbanza e Muros-Noia e a Secretaría das Mulleres da CIG As Rías.
