Os grupos da oposición da Corporación de Ribeira (BNG, PSdG e concelleiros non adscritos) adheríronse á Comisión pola Recuperación da Memoria Histórica da Barbanza para reclamar ao Concello a restauración urxente do monumento de lembranza ás vítimas da represión franquista do Malecón, obra da artista noiesa Soledad Penalta, e esixir unha condena institucional dos actos vandálicos acontecidos contra esta.
A través dun comunicado conxunto asinado por Luís o Pérez Barral portavoz do BNG, Francisco Suárez-Puerta Colomer, portavoz do PSdeG-PSOE, Juan Luis Furones Ramos, concelleiro non adscrito, e Tania Redondo Fernández, concelleira non adscrita, xunto cos responsábeis da CRMHB, trasladarán ao pleno da Corporación a súa “máis fonda preocupación e firme condena polos actos vandálicos acontecidos a fin de semana do 16 e 17 de maio contra a placa de memoria histórica situada xunto á escultura realizada pola artista Soledad Penalta, un espazo que representa un símbolo de dignidade democrática, de lembranza e de reparación ás vítimas da represión franquista”, sinalan.
Lembran que esta escultura e o seu espazo memorial “foron aprobados democraticamente polo pleno do Concello de Ribeira, o que evidencia que a defensa da memoria democrática debe situarse por riba de calquera diferenza política e formar parte do compromiso común das institucións coa convivencia, coa verdade histórica e cos valores constitucionais”.
E proseguen: “O ataque a un lugar de memoria non é un simple acto de deterioro material. É un ataque contra a memoria colectiva, contra os valores democráticos e contra o dereito da cidadanía a coñecer a súa propia historia. Cada agresión contra estes espazos busca devolver ao silencio ás vítimas e ás súas familias, perpetuando o esquecemento e a impunidade”. Recordan tamén que “a Lei 20/2022, de Memoria Democrática, establece a protección e conservación dos lugares de memoria democrática, así como o deber das administracións públicas de garantir o seu respecto e preservación. Os actos de destrución, deterioro ou profanación de elementos vinculados á memoria democrática poden constituír unha infracción administrativa grave, ao supoñer danos ou menosprezo sobre bens e espazos amparados pola lexislación memorialista, sen prexuízo doutras posíbeis responsabilidades civís ou penais que puidesen derivarse”.
Os grupos asinantes propoñen así o seguinte:
-A condena pública e institucional destes actos vandálicos contra a escultura en homenaxe ás persoas de Ribeira represaliadas pola ditadura.
A restauración inmediata da placa e dos elementos danados, garantindo a súa conservación e dignidade. Esta restauración farase mediante un acto público no que tamén haxa participación da CRMHB e das vítimas.
-A aplicación efectiva da Lei de Memoria Democrática no relativo á protección, sinalización e preservación dos lugares de memoria.
-O impulso de medidas de protección e mantemento destes espazos para evitar novas agresións.
-O compromiso do Concello coa difusión da memoria democrática mediante actividades educativas, culturais e institucionais que contribúan a transmitir ás novas xeracións os valores da liberdade, da xustiza e da defensa da democracia.
