Este sábado 23 de maio celébrase a segunda xornada da Feira do Libro de Noia con mancheas de actividades e presentacións para todos os públicos, por exemplo obradoiros creativos e infantís.
A xornada comezou cun obradoiro de marionetas a cargo de Francisco López Cierto, na Alameda, a carón do Consistorio (este domingo 24 de maio será a quenda do obradoiro de banda deseñada que impartirá Fon Barreiro na Alameda, para nenas e nenos de máis de 6 anos, en horario de 12.00 a 13.00 horas e cun número máximo de prazas de 25 rapaces).
A Feira do Libro de Noia 2026 é unha cita cultural que regresa á vila os días 22, 23 e 24 de maio e que está a converter o centro de Noia nun espazo de encontro arredor da lectura, a creatividade e a cultura.
Segundo informou o Goberno local, “a recuperación desta celebración responde á aposta do Concello por impulsar actividades culturais de referencia e por poñer en valor a importancia da lectura como ferramenta fundamental de formación, convivencia e participación social”.
Durante os tres días estanse a desenvolver actividades para todos os públicos, con propostas infantís, obradoiros, música, presentacións e sinaturas de libros, ademais da participación de centros educativos e persoas vinculadas ao ámbito cultural.
As actividades celebraranse diante do Concello, no claustro e no Campo da Feira, creando un ambiente cultural aberto e participativo no corazón da vila.
