A directora xeral de Planificación e Ordenación Forestal da Xunta de Galicia, Luisa Piñeiro, visitou este xoves 28 de maio as actuacións que a Ecobrigada
de Amicos está desenvolvendo nos montes veciñais de Noia, no marco do contrato de colaboración coa Consellería do Medio Rural a través do Distrito Forestal ao que pertence o municipio. A Ecobrigada de Amicos é un equipo de traballo impulsado pola asociación inclusiva do Barbanza que combina a protección ambiental e a xestión forestal sostible coa xeración de oportunidades laborais para persoas con discapacidade. Este recurso especializado desenvolve actuacións de conservación, prevención de incendios e mantemento forestal en diferentes puntos do territorio galego, promovendo ademais a inclusión social e laboral no ámbito rural.
O labor da Ecobrigada céntrase tamén no coidado da biodiversidade e na conservación do medio natural, contribuíndo á protección dos ecosistemas forestais mediante actuacións preventivas e sostíbeis que favorecen a mellora do monte galego.
Desta volta as actuacións estanse levando a cabo nos montes veciñais de Noia sobre unha superficie de 10 hectáreas, onde se executan traballos de roza, rexenerado, podas e tratamentos silvícolas preventivos orientados a mellorar o estado das masas forestais e reducir o risco de incendios.
A Ecobrigada está integrada nestes traballos por oito persoas con discapacidade, que desenvolven as tarefas co apoio de maquinaria especializada, entre ela un tractor forestal, e baixo a supervisión de dous técnicos. Durante a visita, Luisa Piñeiro puido coñecer de primeira man o desenvolvemento das actuacións e destacou que “é fundamental impulsar iniciativas que combinen a xestión forestal sostible coa inclusión social, ao tempo que se reforzan as actuacións preventivas para o coidado do monte galego e a prevención de incendios”.
A directora xeral puxo tamén en valor a aposta da Xunta de Galicia por unha contratación pública responsábel, que permite impulsar proxectos con impacto
ambiental e social positivo, favorecendo a creación de emprego inclusivo e o desenvolvemento de iniciativas comprometidas coa conservación do territorio.
Desde Amicos, o director xeral Xoán España Vidal sinalou que este tipo de contratos permiten xerar emprego estábel e especializado para persoas con discapacidade, ao tempo que contribúen ao coidado e mantemento do monte galego mediante actuacións preventivas fundamentais para a conservación do medio natural e para evitar riscos de incendio durante o verán.
