A Asociación de Amas de Casa de Ribeira culminou a súa viaxe cultural ás chamadas capitais imperiais europeas. Foi, sinalaron, “unha excelente experiencia na cal participou un numeroso grupo de 52 persoas”. Segundo explicaron, o itinerario incluíu visitas a algunhas das cidades máis emblemáticas do continente, comezando en Praga, capital da República Checa, “unha cidade que espertou o noso entusiasmo unánime pola súa gran beleza monumental, a súa historia e atmosfera única”.
O roteiro continuou pola Republica Checa, cunha parada na pintoresca localidade de Cesky Krumlov, cuxo encanto medieval cativou a todas as presentes (o entusiasmo foi “unánime”, indicaron).
Posteriormente a viaxe proseguiu cara a Viena, onde puideron admirar a gran riqueza cultural, arquitectónica e artística da capital austríaca, destacando os seus palacios como o de Schonbrunn, o de Sisi ou o Imperial cos seus espectaculares xardíns, ao mesmo tempo que admiraban as grandes avenidas de Viena as cales reflicten á perfección a súa elegancia e pasado imperial.
As e os participantes na expedición europea tamén puideron mergullarse no rico legado musical de Viena, onde seguen ligados moitos dos grandes compositores da música clásica, sen esquecer os famosos valses que evocan a época imperial. “En conxunto Viena ofrece unha combinación única de esplendor, converténdoa nunha das grandes capitais culturais de Europa”, engadiron dende a asociación, destacando que outro dos momentos especiais foi a estadía en Budapest, capital de Hungría, onde o grupo gozou dun cruceiro polo Danubio, unha experiencia especialmente valorada polas vistas privilexiadas da cidade iluminada, a visita ao palacio Buda e ao Parlamento, no cal puideron gozar da solemne cerimonia do cambio de garda.
O percorrido incluíu tamén a visita á pintoresca cidade pertencente a Hungría chamada Szentendre.
O grupo na súa totalidade regresou encantado non “só pola gran riqueza cultural do itinerario”, senón tamén “polo excelente ambiente de convivencia vivida durante toda a experiencia”. As e os participantes na viaxe expresaron de feito o seu desexo de “volver nun futuro para viaxar coa nosa asociación”. Esta reafirma así o seu compromiso coa promoción de mais actividades de lecer nas que se fomente este tipo de benestar, aprendizaxe e convivencia entre todas as súas persoas socias.
