A ANPA Santa Uxía do CEIP O Grupo de Ribeira elixiu nova xunta directiva para o período 2026-2028 nunha asemblea extraordinaria celebrada o 29 de maio, na que resultou escollida por unanimidade a candidatura encabezada por Sabela Cuñarro Fiel.
A presidencia cambiará a partir do 20 de xuño, cando Unai González Suárez abandone o cargo tras liderar a asociación desde xaneiro de 2024. A nova directiva estará formada por dez membros.
A actual xunta despedirase o 19 de xuño, coincidindo coa festa fin de curso organizada pola ANPA no colexio pola mañá e no Yumi Yai pola tarde. Na súa despedida, a directiva agradeceu o apoio das familias e desexou éxito á nova equipa en beneficio da comunidade educativa.
Ademais, a entidade lembrou o éxito da I Xornada das Letras Galegas, celebrada o pasado 15 de maio, que reuniu preto de 500 persoas nunha tarde de inchables, obradoiros, xogos tradicionais, música, merenda e o concerto de Pakolas.
