A Xunta Local da Asociación Española Contra o Cancro na Pobra do Caramiñal celebrará o vindeiro 14 de xuño, ás 10:00 horas, a andaina solidaria A Pobra do Caramiñal en marcha contra o cancro, unha iniciativa aberta a toda a veciñanza coa que se busca fomentar a participación social e amosar apoio ás persoas con cancro e ás súas familias.
A actividade, que ten o respaldo do Concello da Pobra, contará con dous percorridos adaptados a diferentes públicos e niveis. Haberá unha ruta de 11 quilómetros, para as persoas habituadas a camiñar, e outra de 6 quilómetros, pensada para familias, nenos e nenas ou persoas que prefiran realizar un traxecto máis curto.
Inscricións abertas
O prezo da inscrición será de 5 euros para persoas adultas e de 3 euros para nenos e nenas de ata 12 anos. Ademais, cada participante recibirá un dorsal personalizable no que poderá escribir unha dedicación especial ou unha mensaxe de apoio á loita contra o cancro.
As inscricións poden realizarse presencialmente en Farmacia María Abeijón, Farmacia Tato, Farmacia Elsa Peñaranda Martínez, Farmacia Manuela Barrosa, Atmósfera Sport Maniotas/ Sportmoda, Muebles Lijó, Don Tacón e nas mesas informativas da Asociación Española Contra o Cancro situadas nos Xardíns Valle-Inclán os mércores e sábados de 11.00 a 13.30 horas e domingos de 11.30 a 14.00 horas.
Tamén se poden realizar en liña na páxina web da iniciativa En Marcha Contra El Cáncer.
Antes do inicio da andaina, a praza Alcalde Segundo Durán será amenizada coa actuación do alumnado de Boa Vibra Academia. Unha vez rematada a andaina, desenvolverase unha actividade infantil pola Clínica Dental Doutor Gonzalo López Castro e unha actuación altruísta de DJ Jalaiko.
Dende a Xunta Local da Asociación Española Contra o Cancro na Pobra do Caramiñal agradecen ademais a colaboración de Fabri-SEFORGASA pola de froita do avituallamento, así como o apoio de todas as persoas, entidades e empresas que están colaborando de maneira altruista nesta iniciativa solidaria.
Unidos cos pacientes e coa investigación oncolóxica
A AECC da Pobra explica que “participar nesta actividade é unha forma sinxela de apoiar ás persoas que están a atravesar un cancro” e que “grazas a iniciativas como esta andaina solidaria, en 2025 a Asociación Española Contra o Cancro puido acompañar a máis de 2.600 persoas na provincia da Coruña, ofrecéndolles de maneira totalmente gratuíta apoio psicolóxico e social, así como servizos de logopedia, nutrición ou fisioterapia”.
A recadación obtida contribúe ademais a financiar novos proxectos científicos e a seguir impulsando avances fronte ao cancro. Na provincia da Coruña, a Asociación conta actualmente con 38 proxectos activos, cun investimento que supera os 5,3 millóns de euros, e só en 2025 destináronse máis de 1,3 millóns de euros ao impulso de novas investigacións e ao apoio do talento científico.
A presentación
Os detalles da iniciativa déronse a coñecer este xoves 28 en rolda de prensa, nunha cita cos medios na que participaron representantes da asociación e a concelleira Estefanía Ramos, en representación do Concello da Pobra do Caramiñal.
Lembraron que a saída será ás 10.00 horas dende a praza Alcalde Segundo Durán e que a iniciativa contará con dous percorridos adaptados a diferentes niveis: unha ruta longa de 11 quilómetros e unha andaina mini de 6 quilómetros.
As persoas interesadas poderán inscribirse por un prezo de 5 euros no caso das persoas adultas e de 3 euros para nenos e nenas de ata 12 anos. Tamén se habilitou un dorsal solidario para colaborar coa causa sen necesidade de participar na proba.
Con esta actividade búscase promover hábitos de vida saudábeis e continuar apoiando a investigación e os servizos de acompañamento ás persoas con cancro e ás súas familias.
