Este venres 8 de maio vaise celebrar en Rianxo, no Auditorio Municipal a partir das 18.00 horas, un recital poético participativo con micro aberto organizado pola Asociación Cultural Mesa das Verbas coa colaboración do Concello de Rianxo. Será un recital poético convocado para honrar e lembrar a Manoel Antonio, insigne poeta e mariñeiro de Rianxo, que viviu entre 1900 e o 1930 e que publicou unha das grandes obras magnas da literatura galega: o libro de poemas De catro a catro. A xornada dará comezo ás 11.00 horas cunha recepción do Concello que dará paso a un percorrido cultural pola vila que fará paradas no Museo do Mar e na Casa de Manuel Antonio. Ás 14.00 horas haberá un xantar de confraternidade e ás 14.30 horas celebrarase un percorrido polo paseo marítimo. Entre as 18.00 e as 19.30 horas celebrarase o recital no Auditorio.
