A Asociación Boirense de Empresas (ABE) vén de celebrar o sorteo dos premios correspondentes á campaña do Día da Nai, unha iniciativa que, ademais de incentivar as compras nos establecementos asociados, puxo en valor a calidade e singularidade dos produtos ofrecidos polo tecido empresarial de Boiro.
Nesta edición sorteáronse tres cestas gourmet, compostas por viños e produtos de alimentación de alta calidade procedentes dos propios negocios asociados. As persoas gañadoras foron:
Rosario Tubio (tícket rexistrado de Panadería La Espiga)
Silvia Rivas (tícket rexistrado de Café Bar Barbantia)
María del Carmen Sancio (tícket rexistrado de Drolim)
A ABE fixo saber que a campaña contou “cunha gran participación”, acadando un total de 2.210 compras rexistradas a través da web da ABE. Esta cifra supón un incremento do 58% respecto ao mesmo período anterior á campaña, no que se rexistraran 1.398 compras, “o que evidencia o claro efecto dinamizador da iniciativa”, sinalou a asociación, quen tamén trasladou os parabéns ás persoas premiadas e agradeceu a participación de todas as persoas que formaron parte desta acción, “así como o compromiso dos establecementos adheridos”.
A campaña desenvolveuse entre o 20 de abril e o 3 de maio, coincidindo cunha das datas comerciais máis destacadas do ano. Durante este período, as persoas consumidoras puideron participar no sorteo rexistrando os seus tíckets ou facturas de compra en negocios asociados a través da aplicación dispoñíbel na web da entidade, www.abe.gal.
Como elemento distintivo, esta edición incorporou o selo de Produtos das nosas empresas asociadas como garantía de calidade, reforzando a confianza da clientela e destacando o compromiso dos negocios coa excelencia e o produto de proximidade.
Ademais, con motivo do Día do Libro, tamén se fixeron públicos os resultados do concurso asociado a esta celebración. As persoas gañadoras dos exemplares de Mans que teceron futuro, de Antón Rodríguez Gallardo, foron Esther Ferreiro Costa e Lecturafilia, que xa recibiron os seus premios.
Con estas accións, a Asociación Boirense de Empresas continúa a traballar na dinamización do comercio local e na posta en valor dun modelo baseado na calidade, a confianza e o compromiso co territorio.
