A Asociación Boirense de Empresas (ABE) presenta o cuarto e último eixo do proxecto Mans que teceron futuro. 6 historias de mulleres que construíron o noso presente, unha proposta cultural e de memoria histórica que pon en valor o papel de mulleres fundamentais na construción social, económica e humana de Boiro.
O proxecto nace do traballo de investigación e documentación desenvolvido por Antón Rodríguez Gallardo, autor do libro que recolle e analiza as historias destas mulleres e o seu impacto na memoria colectiva do territorio. O seu labor permitiu recuperar e contextualizar relatos de vida que, en moitos casos, permanecían dispersos ou pouco visibilizados.
Tras a presentación do libro, a mesa de emprendemento e o ciclo audiovisual Fálame sempre, a ABE dá agora un paso máis coa creación dun espazo dixital específico que reunirá e ampliará todos os contidos do proxecto “de maneira accesíbel e permanente”, informou a asociación empresarial.
Esta nova fase contará cunha plataforma web propia e cunha serie audiovisual e editorial estruturada en publicacións semanais nas redes sociais, ademais dun peche final colectivo baixo o título Mans que teceron futuro.
A iniciativa recolle as historias de seis mulleres que, desde contextos e realidades moi distintas, contribuíron de maneira decisiva á evolución social e económica do municipio:
-Luísa Vilá, vinculada á industria sardiñeira e ás relacións entre as dúas beiras da ría.
-Carmen Rebollido, exemplo de resiliencia e capacidade emprendedora en contextos adversos.
-Isabel Maestre, pioneira no comercio e no liderado económico nun tempo marcado polas barreiras para as mulleres.
-Mercedes, representación da emigración interna e do traballo invisible que sostivo fogares e familias.
-Manuela, mestra comprometida coa educación como ferramenta de transformación social.
-Bríxida Muñiz, símbolo da loita contra o caciquismo e da defensa da dignidade colectiva.
A estas historias sumarase tamén un contido especial dedicado ás mariscadoras de Boiro, protagonistas de mobilizacións clave na defensa dos recursos mariños e da economía local.
Baixo a idea central de Estas historias non son pasado. Son o que somos, o proxecto busca conectar a memoria local coa identidade actual do territorio, reivindicando o papel das mulleres na construción do tecido social e económico de Boiro.
A través desta iniciativa, a ABE reforza o seu compromiso coa cultura, a igualdade e a recuperación do patrimonio inmaterial, integrando formatos audiovisuais, narrativos e dixitais nunha proposta de acceso aberto para toda a cidadanía.
Calendario de publicacións
Mércores 13 de maio: estrea da web recopilatoria do proxecto e publicación dedicada a Luísa Vilá.
Domingo 24 de maio: publicación sobre Carmen Rebollido.
Domingo 31 de maio: publicación sobre Isabel Maestre.
Domingo 7 de xuño: publicación sobre Mercedes.
Domingo 14 de xuño: publicación sobre Manuela.
Domingo 21 de xuño: publicación sobre Bríxida Muñiz.
Domingo 28 de xuño: publicación especial dedicada ás mariscadoras de Boiro e peche colectivo baixo o título Mans que teceron futuro.
Quen queira máis información do proxecto tena na web da ABE.
