UCIN Boiro, a través do seu coordinador, Miguel Piqueras, emitiu un comunicado no que reclama ao Goberno local a restauración de urxencia do cruceiro de Fonteneixe, que, segundo indican, atópase en “estado crítico” de abandono, malia tratarse, sinalan, “dunha peza fundamental do patrimonio cultural do concello que, a pesar de estar catalogada, presenta fendas e unha grave deterioración por falta de mantemento”.
Dende UCIN subliñan que o custo dunha restauración profesional, que inclúa a análise, diagnose e execución por parte dun experto, oscila entre os 2.000 e os 3.000 euros.
Piqueras adiantou que a formación presentará unha instancia oficial exixindo a intervención inmediata e engadiu que “se non hai un compromiso firme e orzamentado do Concello para restaurar o Cruceiro de Fonteneixe, UCIN presentaremos unha denuncia formal ante a Dirección Xeral de Patrimonio Cultural da Xunta de Galicia”.
