A Plataforma Stop Desahucios Barbanza emitiu un comunicado no que lamenta “a falta de axilidade” que sofren as tramitacións relacionadas cos informes e demais documentación que a Valedora do Pobo (María Dolores Fernández Galiño) require aos Concellos. Na orixe deste comunicado están as queixas presentadas por algúns cidadáns, principalmente en caso de execucións hipotecarias ou desafiuzamentos en xeral, e tamén están, segundo explican dende a plataforma, “as demoras de Concellos como o de Ribeira”.
Stop Desafiuzamentos Barbanza sinala que “dende a oficina da Valedora do Pobo, en ocasións, teñen que dirixirse por escrito en máis de tres ocasións aos Concellos pola demora na remisión da documentación solicitada que pode prexudicar ao propio cidadán que se queixa ante a súa indefensión ante unha entidade financeira, fondo de investimento, fondo voitre, grupo inmobiliario ou un particular”.
Para a plataforma “os Concellos están obrigados legalmente a facilitar as devanditas informacións ao ser un organismo dependente do propio Parlamento de Galicia, que son os encargados de ditar as medidas lexislativas pertinentes”.
