O Concello de Dodro vén de denunciar o roubo dunha oliveira plantada con motivo do Día Internacional da Muller no paseo das estrela situado ao carón do concello. Dende o Consistorio lembran a creación hai un ano dun espazo destinado aos homenaxes do Día Internacional da Muller e que este 2026 colocáronse placas que lembran a varias asociacións que traballan no concello: AMIPA, Andaina Prosaúde Mental, CIM Terras de Iria e Club Deportivo Dodro. Xunto a esas placas dispuxéronse plantas e árbores para que foran medrando ano a ano e serviran de elemento ornamental pero tamén simbólico da homenaxe ás mulleres. Unha delas, unha oliveira, foi roubada en días pasados. Desde o Concello cualificaron o roubo de “feito ruín” e sinalaron que se ben o valor económico é mínimo, “o sentimental é enorme e non se entende ese comportamento”.
E engaden: “Apelamos a moral da veciñanza para que condene este tipo de feitos. O coidado dos bens públicos, a preservación dos espazos de memoria é un traballo de todos. Todos nos beneficiamos do esforzo das persoas e asociacións que son homenaxeadas no paseo das estrelas, destruír ou roubar o que alí hai e roubarnos a todos”.
Porén, desde o Goberno municipal recoñecen que estes feitos “son excepcións” e que “á maioría da veciñanza non se lle ocorrería facer algo así”. E conclúen: “Damos as grazas á xente de bo corazón e condenados estes feitos con toda a rotundidade posíbel”.
