O Concello de Ribeira volve sumarse ao programa de mobilidade teatral “Sobes ao autobús do teatro?” do Centro Dramático Galego, que permitirá á veciñanza desprazarse ata Santiago de Compostela o vindeiro 10 de abril para asistir á representación de Hamlet.
A función terá lugar no Salón Teatro, e o autobús partirá ás 15.45 horas desde a estación de Ribeira. O prezo conxunto do desprazamento e da entrada é de 5 euros.
As persoas interesadas en participar nesta iniciativa deberán reservar praza antes do 9 de abril, ben por teléfono ou a través de correo electrónico en horario de atención ao público.
A obra Hamlet, do dramaturgo William Shakespeare, preséntase nesta ocasión nunha versión galega contemporánea dirixida por Tito Asorey, quen asina a adaptación xunto á dramaturga Vanesa Sotelo. Trátase dunha produción propia de gran formato do Centro Dramático Galego, con 16 intérpretes en escena.
Publicada en 1603, a traxedia do príncipe danés chega agora reinterpretada desde unha óptica actual, abordando cuestións como a identidade, a ética ou o impacto das novas tecnoloxías, nun diálogo coa sociedade contemporánea e cos retos da era das intelixencias artificiais.
