Con motivo da celebración do Día do Libro (este 23 de abril), Rianxo vai dar acollida á proxección e coloquio do documental A Rebelión da lectura de Espazo Lectura. Contarase coa presenza das directoras Asun G. Losada e Alma Alonso.
Trátase dunha proposta promovida pola Deputación da Coruña e a colaboración do Concello de Rianxo.
A cita será este xoves 23 de abril ás 19.00 horas na Sala Arcos Moldes do Auditorio Municipal, con entrada de balde até completar a capacidade do aforo.
A rebelión da lectura é un documental sobre a historia de Espazo Lectura, unha recoñecida asociación de fomento da lectura en galego.
Espazo Lectura é unha asociación sen ánimo de lucro que fomenta a lectura en lingua galega. Mediante voluntariado, desenvolve ao longo do ano actividades para todas as idades: dende bebés a adultos (Noite na Biblioteca, Contomar, Lendo Contigo, Contos en Cueiros, Lecturas Debuxadas…).
No ano 2026 celébranse os 20 anos do Contomar, a primeira actividade de Espazo Lectura, e para celebralo preparouse unha longametraxe documental sobre a historia da asociación, que recolle todos estes anos de traballo e ilusión: A rebelión da lectura.
