O vindeiro luns, 4 de maio, ás 20.00 h, Quico Cadaval, o polifacético artista orixinario de Ribeira, estará no Hospital da Barbanza para animar as persoas que continúan protestando contra os responsábeis sanitarios na comarca e que reclaman a redución das listas de espera. Cadaval achegará o espectáculo Noite de Conto. Será un acto aberto en apoio do peche no Hospital.
Lembrar que as cidadás que compoñen a Plataforma en Defensa da Sanidade Pública do Barbanza comezaron o pasado martes, 21 de abril, concentracións neste hospital público para solicitar unha xuntanza cos responsábeis da xestión sanitaria na comarca. O obxectivo, lembran, “é reclamar transparencia nas listas de espera e que estas se axilicen”. Fronte a unha nova negativa a reunirse coas representantes da Plataforma, ao día seguinte decidiuse pasar das concentracións matinais a un peche continuado na entrada do Hospital da Barbanza. Recordan tamén que “a primeira solicitude de reunión foi hai xa 819 días”.
E engaden: “Até o de agora os datos feitos públicos polo SERGAS non recollen fidedignamente a realidade da situación relativa ás listas de espera: esquecen sempre as segundas consultas e as probas diagnósticas solicitadas nesas segundas consultas, que en ocasións supoñen demoras de máis dun ano”. Apuntan tamén que “a situación das primeiras consultas non é moito mellor, xa que as cifras ofrecidas fan a media entre consultas primeiras urxentes, preferentes e ordinarias, o que implica que un número significativo de pacientes debe esperar bastante máis ca esa media”.
Club de Lectura de Ribeira
Tamén en apoio ao peche no Hospital da Barbanza, o Club de Lectura de Ribeira trasladará hoxe xoves, 30 de abril, a súa xuntanza. Pasará de celebrarse no Ateneo Valle-Inclán a ter lugar na entrada do Hospital, ás 20.30 h.
Continúan tamén as concentracións nos centros de saúde
Ademais do peche indefinido no Hospital, continúan as concentracións nos centros de saúde:
Hoxe, xoves, 30 de abril (último xoves do mes), ás 12 h: diante do Centro de Saúde de Ribeira, haberá concentración para reclamar a cobertura de todas as ausencias: unha praza de tarde de médico de familia (de 14 totais), unha praza de tarde de enfermería e unha praza de tarde de matrona (de 2 totais), que se está a cubrir cunha matrona que acude 3-4 horas tres días por semana.
O vindeiro martes, 5 de maio (primeiro martes do mes), ás 19 h: diante do Centro de Saúde de Rianxo, haberá concentración para reclamar a apertura do PAC as 24 horas, a necesidade dunha ambulancia as 24 horas, o reforzo de pediatría e a cobertura de ausencias.
Ademais, a Plataforma informa que “de maneira excepcional e por mor de ser festivo, o venres 1 de maio non haberá as habituais concentracións semanais na Pobra do Caramiñal e en Aguiño”.
